1Cor 12 | AAK | STEP | Gí̵ nɨrɨxí̵meáyí̵ne', seyí̵ne' payí̵ nearo Gorɨxo xegí̵ kwíyí̵pɨ sɨxí̵ seamímoŋí̵pimɨ dánɨ e e epaxí̵ imóní̵í̵rɨxɨnɨrɨ seaimɨxɨŋí̵ seyí̵ne' yarɨŋí̵ nigí̵ápɨ nánɨ “Seyí̵ne' xe mají̵á nero oe'poyɨ.” mɨnimónarɨnɨ.

1 Corinthians 12

“Kwíyí̵pimɨ dánɨ epaxí̵ imónɨgí̵ápɨ bɨ bɨ imónɨnɨ.” urɨŋí̵ nánɨrɨnɨ.

1 Gí̵ nɨrɨxí̵meáyí̵ne', seyí̵ne' payí̵ nearo Gorɨxo xegí̵ kwíyí̵pɨ sɨxí̵ seamímoŋí̵pimɨ dánɨ e e epaxí̵ imóní̵í̵rɨxɨnɨrɨ seaimɨxɨŋí̵ seyí̵ne' yarɨŋí̵ nigí̵ápɨ nánɨ “Seyí̵ne' xe mají̵á nero oe'poyɨ.” mɨnimónarɨnɨ. 2 Seyí̵ne' sɨnɨ Gorɨxomɨ mɨxí̵dɨpa neróná seaigí̵ápɨ nánɨ nɨjí̵á imónɨŋoɨ. Ámáyá mimóní̵ ŋwí̵á imónɨŋí̵yo —Ayí̵ xwɨyí̵á bɨ rɨpaxí̵ mimónɨŋí̵yí̵rɨnɨ. Ayo oxí̵dí̵poyɨnɨrɨ yapí̵ pí pí seaiepɨsíáná seyí̵ne' nepaxɨnɨrɨ xí̵dagí̵ápɨ nánɨ nɨjí̵á imónɨŋoɨ. 3 Ayɨnánɨ “Seyí̵ne' nɨjí̵á re oimóní̵poyɨ.” nimónarɨnɨ. Ámá wí Gorɨxoyá kwíyí̵pimɨ dánɨ nɨrɨrí̵ná wí re rɨpaxí̵ menɨnɨ, “Jisaso xewanɨŋo roapɨkínɨŋorɨnɨ.” rɨpaxí̵ menɨnɨ. Ámá wí Gorɨxoyá kwíyí̵pimɨ dánɨ mɨrɨpa nerí̵náyí̵, “Jisaso negí̵ Ámɨnáorɨnɨ.” enɨ wí rɨpaxí̵ menɨnɨ.

4 Kwíyí̵pimɨ dánɨ e e epaxí̵ imóní̵í̵rɨxɨnɨrɨ sɨxí̵ umímoarɨŋí̵pɨ xɨxegí̵nɨ imónɨŋagɨ aiwɨ kwíyí̵ axí̵pɨ ná bɨnɨ imónɨŋí̵pimɨ dánɨnɨ yarɨgí̵árɨnɨ. 5 E nerɨŋí̵yo dánɨ ámáyo seáyí̵ e e wíí̵rɨxɨnɨrɨ Ámɨnáo wimɨxarɨŋí̵pɨ xɨxegí̵nɨ eŋagɨ aiwɨ Ámɨnáo, ayí̵ ná wonɨ axorɨnɨ. 6 Ananɨ nepaxí̵ imónɨgí̵ápɨ xɨxegí̵nɨ imónɨŋagɨ aiwɨ Gorɨxo, ayí̵ ná wonɨ e e epaxí̵ imóní̵í̵rɨxɨnɨrɨ eŋí̵ sɨxí̵ weámɨxarɨŋí̵rɨnɨ. 7 E nerɨŋí̵ aiwɨ o ámá xí̵oyá imónɨgí̵á ní̵nɨ xɨxe arɨrá iní̵í̵rɨxɨnɨrɨ womɨnɨ womɨnɨ xegí̵ kwíyí̵yo dánɨ epaxí̵ imónɨŋí̵pɨ bɨ bɨ yaŋí̵ wiarɨŋí̵rɨnɨ. 8 Bɨ bɨ yaŋí̵ nɨwirí̵ná ámá wo kwíyí̵pimɨ dánɨ xe dɨŋí̵ e'mí̵ saímí̵ nɨmorɨ ámáyo píránɨŋí̵ urɨpaxí̵ oimónɨrɨ wirɨ wo kwíyí̵ axí̵pimɨ dánɨ xe nɨjí̵á seáyɨ e nimónɨrɨ píránɨŋí̵ ure'wapɨyipaxí̵ oimónɨrɨ wirɨ 9 ámɨ wo kwíyí̵ axí̵pimɨ dánɨ xe dɨŋí̵ ayá wí onɨkwí̵ronɨrɨ wirɨ ámɨ wo kwíyí̵ axí̵pimɨ dánɨ xe eŋí̵ sɨxí̵ neánɨrɨ ámá sɨmɨxí̵ yarɨgí̵áyo píránɨŋí̵ owimɨxɨnɨrɨ wirɨ 10 ámɨ womɨ emɨmí̵ epaxí̵ oimónɨrɨ wirɨ ámɨ womɨ xí̵oyá xwɨyí̵á wí̵á urókiamopaxí̵ oimónɨrɨ wirɨ ámɨ womɨ ámá wí kwíyí̵ bimɨ dánɨ rarɨŋagí̵a arí̵á nɨwirí̵ná adadí̵ nɨwirɨ “Ayí̵ kwíyí̵ apimɨ dánɨ rí̵a rarɨŋoɨ?” yaiwipaxí̵ oimónɨrɨ wirɨ ámɨ wo ámá gwí̵ wɨrí̵ wɨrí xwɨyí̵á mí̵kí̵ apɨ apimɨ dánɨ ananɨ rɨpaxí̵ oimónɨrɨ wirɨ ámɨ womɨ xwɨyí̵á mí̵kí̵ apɨ apimɨ dánɨ arí̵á nɨwirɨ yaŋí̵ umeaipaxí̵ oimónɨrɨ wirɨ yarɨŋí̵rɨnɨ. 11 Gorɨxo ámá wíyí̵ wíyo yaŋí̵ xɨxegí̵nɨ e e nɨwia nurɨ aiwɨ kwíyí̵ axí̵ ná bimɨ dánɨnɨ e e epaxí̵ imóní̵í̵rɨxɨnɨrɨ nɨwimɨxɨrí̵ná womɨ pípɨ owimɨnɨrí̵ná apɨ wiarɨŋí̵rɨnɨ. Ámɨ womɨ pípɨ owimɨnɨrí̵ná apɨ wiarɨŋí̵rɨnɨ.

“Obaxene imónɨŋagwɨ aiwɨ wará ná bɨní̵nɨŋí̵ imónɨŋwɨnɨ.” urɨŋí̵ nánɨrɨnɨ.

12 Ámáyá wará ná bɨnɨ eŋagɨ aiwɨ nápimɨ dánɨ we' sɨkwí̵ amɨpí xɨxegí̵nɨ bɨ bɨ imónɨnɨ. Warápimɨ dánɨ amɨpí xɨxegí̵nɨ bɨ bɨ imónɨŋí̵yí̵ ní̵nɨ obaxí̵ imónɨŋagɨ aiwɨ nápɨ ná bɨnɨrɨnɨ. Ámá Kiraisoyá sɨyikí̵pɨ imónɨgí̵áyí̵ ámá warápɨ tí̵nɨ rí̵ramɨŋɨyí̵ imónɨpaxí̵rɨnɨ. 13 Ayí̵ rɨpɨ nánɨrɨnɨ. Nene —Wiene Judayeneranɨ, wiene Gɨrikɨyeneranɨ, wiene xɨnáíwane'nɨŋí̵ nimónɨrane omɨŋí̵ wiiarɨŋwae'neranɨ, wiene áxeŋwarí̵ mɨneainí̵ negí̵ dɨŋí̵ tí̵nɨ emearɨŋwae'neranɨ, —Nɨnenenɨ enɨ kwíyí̵ axí̵pimɨ dánɨnɨ sɨyikí̵ ná bɨnɨ imónanɨ nánɨ wayí̵ neameairo kwíyí̵ axí̵pɨnɨ neaaínɨrɨ eŋí̵ eŋagɨ nánɨ rarɨŋɨnɨ. 14 Nene nɨjí̵á re imónɨŋwɨnɨ. Ámá warápɨ, ayí̵ ná bɨnɨ mimóní̵ sɨkwí̵ranɨ, we'ranɨ, mɨŋí̵ranɨ, xɨxegí̵nɨ bɨ bɨ imónɨnɨ. 15 Sɨkwu' xwɨyí̵á rɨpaxí̵ nimónɨrɨ re ránáyí̵, “Niu'nɨ we'u'nɨ mimónɨŋagɨ nánɨ nápiyá bɨnɨmanɨ.” ránáyí̵, “ ‘Nápimɨ dánɨ bɨ imónɨŋí̵pɨmanɨ.’ yaiwipaxí̵rɨnɨ.” rɨseaimónarɨnɨ? Oweoɨ. 16 Arí̵ána enɨ re ránáyí̵, “Niɨnanɨ sɨŋwí̵yínɨ meŋagɨ nánɨ nápiyá bɨnɨmanɨ.” ránáyí̵, “ ‘Nápimɨ dánɨ bɨ imónɨŋí̵pɨmanɨ.’ yaiwipaxí̵rɨnɨ.” rɨseaimónarɨnɨ? Oweoɨ. 17 Nápɨ ní̵nɨ sɨŋwí̵nɨ eŋánáyí̵, arɨge nerɨ arí̵á epaxí̵rɨnɨ? Nápɨ nɨpɨnɨ arí̵ánɨ eŋánáyí̵, arɨge nerɨ dɨŋí̵ weánɨpaxí̵rɨnɨ? 18 Nápɨ, ayí̵ axí̵pɨ ná bɨnɨ mimónɨnɨ. Sɨŋwí̵ranɨ, arí̵áranɨ, apɨ apɨ e nimóga u'wɨnɨgɨnɨrɨ Gorɨxo xí̵o wimónɨŋí̵pa dɨŋí̵ neyírorɨ nimɨxɨrɨ tɨŋí̵rɨnɨ. 19 Warápimɨ dánɨ amɨpí sɨkwí̵ranɨ, we'ranɨ, xɨxegí̵nɨ imónɨŋí̵pa mimóní̵ axí̵ ná bɨnɨ nimónɨrí̵náyí̵, warápɨ arɨge imónɨpaxí̵rɨnɨ? Oweoɨ, e nerí̵náyí̵, wará xegí̵ imónɨŋí̵pa bɨ imónɨpaxí̵ menɨnɨ. 20 Negí̵ wará imónɨŋí̵pɨ, ayí̵ rɨpɨrɨnɨ. Warápimɨ dánɨ amɨpí xɨxegí̵nɨ we'ranɨ, sɨkwí̵ranɨ, imónɨŋí̵pɨ ayí̵ obaxí̵ aiwɨ warápɨ, ayí̵ ná bɨnɨrɨnɨ. 21 Sɨŋwí̵yi xwɨyí̵á rɨpaxí̵ nimónɨmáná we'u'mɨ wí re urɨpaxí̵ menɨnɨ, “Ná saŋí̵ mɨnɨráparɨŋu'xɨ, pí nánɨ ju'xɨ tí̵nɨ nawínɨ imónɨmí̵ɨnɨ? Niɨyínɨ ananɨ nɨgí̵pɨ ŋweapaxí̵yínɨrɨnɨ.” urɨpaxí̵ menɨnɨ. Mɨŋí̵yi enɨ sɨkwu'mɨ wí re urɨpaxí̵ menɨnɨ, “Ná saŋí̵ mɨnɨráparɨŋu'xɨ, pí nánɨ ju'xɨ tí̵nɨ nawínɨ ŋweámí̵ɨnɨ? Niɨyínɨ ananɨ nɨgí̵pɨ ŋweapaxí̵yínɨrɨnɨ.” urɨpaxí̵ menɨnɨ. 22 Oweoɨ, pí pí nápimɨ dánɨ imónɨŋí̵ “Eŋí̵ meánɨŋí̵pɨrí̵anɨ?” yaiwiarɨŋwápɨ meŋánáyí̵, omɨŋí̵ amɨpí nene nápimɨ dánɨ yarɨŋwápɨ nɨpɨkwɨnɨ epaxí̵ menɨnɨ. 23 Nápimɨ dánɨ imónɨŋí̵ “Naŋí̵ onɨmiápɨ imónɨŋí̵pɨrɨnɨ.” yaiwiarɨŋwáyí̵ nene ananɨ píránɨŋí̵ okiyí̵á mearɨŋwárɨnɨ. Nápimɨ dánɨ imónɨŋí̵ sɨŋánɨ mɨmepaxí̵ imónɨŋí̵yí̵ píránɨŋí̵ rɨtí̵ yarɨŋwárɨnɨ. 24 E nerɨ aí pí pí nápimɨ dánɨ imónɨŋí̵ “Awiaxí̵ imónɨŋí̵pɨrí̵anɨ?” yaiwiarɨŋwápɨ, ayí̵ rɨtí̵ mepaxí̵ imónɨŋagɨ nánɨ wí e yarɨŋwámanɨ. Gorɨxo ámá warápɨ nimɨxɨrɨ pí pí nápimɨ dánɨ eŋí̵pɨ nɨŋwɨrárɨrí̵ná “Naŋí̵ onɨmiápɨ imónɨnɨ.” yaiwiarɨŋwápɨ seáyɨ e imóní̵wɨnɨgɨnɨrɨ ŋwɨrárɨŋí̵rɨnɨ. 25 Nápimɨ dánɨ imónɨŋí̵yí̵ mɨdɨmɨdánɨ mɨmearónɨpa ero xɨxe píránɨŋí̵ menɨro epí̵rí̵a nánɨ e ŋwɨrárɨŋí̵rɨnɨ. 26 Nápimɨ dánɨ imónɨŋí̵ bɨ rí̵nɨŋí̵ wináná nápimɨ dánɨ imónɨŋí̵ nɨpɨnɨ rí̵nɨŋí̵ winárarɨŋí̵rɨnɨ. Bɨ imónɨŋí̵pimɨ yayí̵ ume'áná nɨpɨnɨ dɨŋí̵ nií̵á nɨwiga warɨŋí̵rɨnɨ.

27 Kiraisoyá sɨyikí̵pɨ imónɨgí̵áyí̵ne' oyá warápí̵nɨŋí̵ imónɨro wiyí̵ne'nɨ wiyí̵ne'nɨ oyá nápimɨ dánɨ sɨkwí̵nɨŋí̵ranɨ, we'nɨŋí̵ranɨ, xɨxegí̵nɨ imónɨro eŋoɨ. 28 Gorɨxo ámá xí̵oyá sɨyikí̵pɨ imónɨgí̵áyí̵ xɨxegí̵nɨ bɨ bɨ nimóga u'í̵rɨxɨnɨrɨ rí̵peaŋí̵rɨnɨ. Wí wáí̵ wurɨmeiarɨgí̵áyí̵ imónɨro wí xewanɨŋoyá xwɨyí̵ápɨ wí̵á urókiamoarɨgí̵áyí̵ imónɨro wí ure'wapɨyarɨgí̵áyí̵ imónɨro epí̵rí̵a nánɨ rí̵peaŋí̵rɨnɨ. Xɨránɨ xɨránɨ imónɨŋí̵ apɨ apɨ nɨrí̵peámáná ámɨ wí emɨmí̵ epí̵rí̵a nánɨ imónɨro wí sɨmɨxí̵ yarɨgí̵áyo naŋí̵ wimɨxɨpí̵rí̵a nánɨ imónɨro wí dí̵wí̵ ikeamónarɨgí̵áyo arɨrá wipí̵rí̵a nánɨ imónɨro wí pí pí omɨŋí̵ yarɨgí̵áyo mepí̵rí̵a nánɨ imónɨro wí ámá gwí̵ wɨrí̵ wɨrí xwɨyí̵á mí̵kí̵ apɨ apimɨ dánɨ rɨpí̵rí̵a nánɨ imónɨro epí̵rí̵a nánɨ rí̵peaŋí̵rɨnɨ. 29 Ní̵nɨ wáí̵ wurɨmeiarɨgí̵áyí̵ rimónɨŋoɨ? Ní̵nɨ wí̵á rókiamoarɨgí̵áyí̵ rimónɨŋoɨ? Ní̵nɨ ure'wapɨyarɨgí̵áyí̵ rimónɨŋoɨ? Ní̵nɨ emɨmí̵ yarɨgí̵áyí̵ rimónɨŋoɨ? 30 Ní̵nɨ sɨmɨxí̵yo naŋí̵ imɨxɨpí̵rí̵a nánɨ rimónɨŋoɨ? Ní̵nɨ gwí̵ wɨrí̵ wɨrí xwɨyí̵á mí̵kí̵ apɨ apimɨ dánɨ rɨpí̵rí̵a nánɨ rimónɨŋoɨ? Ní̵nɨ xwɨyí̵á mí̵kí̵ apɨ apimɨ dánɨ rarɨgí̵ápɨ yaŋí̵ umeaipí̵rí̵a nánɨ rimónɨŋoɨ? Oweoɨ. 31 E nɨsearɨrɨ aí seyí̵ne' woxɨnɨ woxɨnɨ, “Gorɨxo ámá e e epaxí̵ imóní̵í̵rɨxɨnɨrɨ kwíyí̵pimɨ dánɨ sɨxí̵ umímoarɨŋí̵ apɨ apɨ eŋagɨ aí sa seáyɨ e imónɨŋí̵pɨ oimónɨmɨnɨ.” nɨyaiwirɨ sí̵mí̵ xeadí̵pe'ní̵ɨrɨxɨnɨ.